[文章轉貼]如果小朋友係"左撇子"

如果小朋友係"左撇子"，應該點樣教?

https://m.facebook.com/story.php?story_fbid=1059698060773212&id=789617517781269

原來噚日8月13日係國際左撇子日~最初，知道有呢個節日時，覺得好新奇，於是，就嘗試上網搵下關於呢個節日嘅資料~最後，發現呢個節日其實係由一個喺美國嘅左撇子組織所創立嘅~創立嘅原因係希望右撇子(世界人口的大多數—90%)喺呢一日多多關心左撇子(世界人口的小數—10%)嘅生活需要，當中包括重視佢哋喺日常生活、教育同埋工具設計上嘅權益~ 好神奇嘅係原來過往7任美國總統當中，就有5位都係左撇子！

而我喺工作嘅時候，就經常會遇到本來主用手係左手嘅小朋友被長輩強逼而改爲用右手來寫字嘅情況。佢哋喺冇指示嘅情況之下，通常都會傾向用番左手嚟攞嘢、揸鉸剪、拋波、接波等，甚至乎佢哋嘅左腳都會比較叻啲、有力啲，而主視眼都係左眼~咁點解有啲人嘅主用手係左手？有啲又係右手呢？原來，係同我哋嘅腦部發展有關，左撇子嘅右腦發展係比較發達(*須知人類嘅右腦係負責控制左邊身體嘅肌肉)，而右撇子則相反，所以主用手嘅發展就好似性別一樣，都係與生俱來嘅~如果家長強逼小朋友用唔係先天嘅主用手嚟做嘢，可能會影響到佢哋嘅腦部發展~

當我哋強逼左撇子用右手嘅時候，其實同時會減少佢哋發展較爲發達嘅右腦嘅活動，科學研究發現，右腦主要負責藝術、創作、想像、視覺處理、空間知覺、圖像思考、情緒表達，是爲「藝術腦」，而左腦則主要負責語言處理、邏輯思考、判斷力、閱讀、科學/數學等，是爲「知性腦」(*可參閱附圖)。因此，強逼小朋友用右手，其實會阻礙咗佢哋右腦嘅發展、限制同埋浪費咗佢哋原本較強嘅潛能。佢哋亦可能因爲被強逼用非主用手而要用更加多時間去適應用右手嚟寫字、剪紙、做運動等，而所輸出嘅工作質素往往較低，例如:字體不美觀，佢哋通常亦會較容易覺得攰。

相信長輩強逼小朋友用右手嘅出發點都係好，想小朋友長大後，生活方便啲，須知世界上大多數嘅人都係用右手嘅，所以好多工具，例如:鉸剪、球拍、樂器、相機、售票機等都係根據用右手嘅習慣而生產嘅，於是，對左撇子嘅生活就產生咗好多不便~亦有家長因爲主用手係右手，而擔心唔識教左撇子小朋友而強逼佢哋用右手。

其實時代進步，坊間已經有好多專為左撇子而設計的用具，亦發展出更多的方法去教佢地寫字丶運用唔同嘅工具俾家長參考：http://mamaot.com/tips-for-teaching-lefties-to-write/。所以，就算小朋友係左撇子都唔需要強逼佢地用番右手，放手讓佢地自由發掘丶探索自己嘅天賦便可以了！*家長最好可以將小朋友嘅需要吿知老師，等佢地都可以在教學時作出配合。